(قارنتك علي ويه اليحكمون) مقارنة رائعة بين الامام علي وساسة اليوم

اسمحوا لي في قصيـدة منقــولة
أن أقارن بين الامام علي عليه السلام وبين من يحكمون دين ٌبسياسة وسياسة ٌبدين
(( قارنتك علي وية اليحكمون))
قارنتــك علـــي ويــة اليحــكمون *** ولكيتك يا علي مفرط بلحــــــكام
شني تحكم الدنية وعرشك بساط *** وشنو بجامع مقر القائد الـــــعام
وشني عود اليتيم يكــظلك البــاب *** اليتيم ايروح يسكن دار الايتــــام
جا ماعادهة ولا كظـــــلك الــباب *** كون بظهرة قنبر يسحب اقســـام
كلشي ايصير مدري يفخخ البيـت *** تحت مهرك ايجوز ايحطلك ألغام
علي شعـــليك اذا بشام جوعـــان *** دشـــبع حزبك ونعلت ابوالشـــام
تكظي الليل تسهر وانتة مسـؤول *** السياسي الزين وي المغرب ينام
بين الناس تخطب يا ابوالحســـنين *** علي المفروض تخطب من ورة الجام
كثّر نوق واطلِـع موكب اويـــاك *** وانشـــر علدرب رمــايت اســـهام
ناكة مظللة تركبهة ابو حســين *** وعمار بن ياسر كــــــعدة كــــــدام
وخل مالك الاشتر كبلك يفـــوت *** يكطع كون ســير الشارع الــــعام
بدولتك هم جنت تنجز مشاريـع *** وهم تاخذ مــــقابل بصمة ابهــــام
فضة وقنبر اشكد ياعلي انطوك*** حتة اتــــعينوا بالــــــبيت خــــــدام
عقيل اشراد منك حتة تــــجويه*** اخيك هاذة ضمة الظــهرك احزام
كبل ماكو دمج ودمجة مــولاي *** علي سجلة سياسي مهدم الاصنام
شعجب ولدك ياعلي ماطلعو ايفاد** ددزهم علــــبحر يكـــضولهم عـــام
دبرلهم عذر خـــلهم يصـــيفون *** بحجت مـــشو دورة لنشر الاسـلام
علي تنطي خبز تتـــلثم اشبـيك *** جامــا كشـــفت وجـــهك للـــــعلام
جا ما صار بينة الصار مولاي *** وظل ياهو اليجي وكال آنة ابو لثام
***************
للشاعر نهاد الخيكاني